1 - ال 300 ألف جنيه

✋ سلام عليكم , إزيكوا يا ولاد ,

أنا عملت المدونة دى مش عشان أفيدكم بأفكاري المهمة جدا , ولا عشان أعبر عن نفسى ككاتب لعل وعسى أنفع وأعمل كتب كتير بقى وأتشهر وأطلع أقول لكم : بلاش تسرقوا مجهودى يا جماعة وبلاش المحروق ال pdf ده وفين حقوق النشر ,,,, لأ , بصراحة أنا عملت البتاعة دى عشان عايز يبقى معايا فلوس بالهبل وألحق أحوش ال 300 , 350 ألف فى خلال سنة ونص بالكتير عشان أبدأ تنفيذ المشروع اللى هيحتاج مني حوالى 3 سنين من الفحت والردم , بس هيجيب حقه المفروض يعنى - طبقا لدراسة الجدوى الرهيبة اللى عملتها - بعد سنة واحدة ,( وده يبقى المشروع الممول للمشروع الرئيسى ) وبلاش يا جماعة حد يسألنى على المشاريع , لا المشروع الممول ولا المشروع الرئيسى  , لأ ما تبوسش كتفى , ولا دراعى , ولا ودنى ( يا شيخ إتنيل , قال يعنى حد هيقرا الهرى بتاعك ده , لأ وكمان هيسأل ) , المهم , أنا عايز 300 ألف ومفيش قدامى حتة أمسك منها فلوس كتير فشخ غير هنا , وطبعا أنا جديد هنا , لا عارف أروح فين ولا آجى منين , فهأقعد أرازى فيكوا يمين وشمال لغاية ما حد ربنا يستره يرحمنى ويرحمكم ويدينى ال 300 ألف دول كهبة لا ترد , وتبقى جابت رزقها ونقفل ونروح , وعشان أجيب فلوس لازم أجيب قراء , وعشان أجيب قراء لازم أكتب بإستمرار , وأنا برغم كونى أذكى حد عايش _ أه وهنتعامل هنا فى المدونة دى مع موضوع أذكى حد عايش ده , كحقيقة مطلقة لا تقبل الطعن ولا التشكيك _ بأكرر برغم كونى أذكى حد عايش إلا إنى بأعانى من بعض المشكلات اللى بيعانى منها معظم الناس الأذكيا جدا بس مهماش أذكى حد عايش , وهى النسيان وصعوبة تجميع الأفكار _ المخ بيشتغل بسرعة رهيبة ف ما بيلحقش يجمع أفكاره ويسقط حاجات مهمة _ فمخى من فرط عبقريته بيفضي بسرعة , وطبعا ده مش هينفع عشان المدونة عايزة إستمرارية عشان تجيب قراء يجيبوا إعلانات يجيبوا فلوس يوصلوا لل 300 ألف ونقفل المحروقة دى ونتفرغ للمشروع العجيب بتاعنا , فقعدت أفكر منين أجيب أفكار للكتابة وبالمرة أعمل حاجة مفيدة _ مفيدة ليا أنا طبعا , شوف رزقك يا عم بعيد عنى , هتشيلنى همك ليه _ , فقلت ياض يا محمد _ ما أعرفش ظاهر عندكوا ولا لأ , بس أنا إسمى محمد الفقى وإحفظوا الإسم ده كويس , أيون إحفظوه كويس _ قلت أشوف برنامج خواطر بتاع أحمد الشقيرى _ برنامج جميل جدا _ وأنقى من أفكاره وأكتب منها , وأهو البرنامج كان بسم الله ما شاء الله ناجح وإتعمل منه ييجى 300 حلقة لو كتبت عن حلقة كل أسبوع يعنى أكتب فى السنة بتاع 60 مقال فشيخ يعنى فى ظرف السنة ونص الديد لاين بتاعى عشان أحوش ال 300 باكو هأحتاج بتاع 100 حلقة ب 100 مقال فشيخ نلم القرشينات ونقفل ونروح , حتى كنت مسمى المدونة ( خواطر من خواطر ) بس قلت إيه ياله الإسم العفش ده ما تختار إسم حلو كده ومطعطع وبيعبر عن شخصيتك , فإخترت إسم جميل ودحلاب كده بيمط معاك , زى ما ظاهر عندكوا ( أذكى حد عايش ) , كفاية عليكوا كدة النهاردة , قصدى كفاية عليا أنا كده  ما باينها صحرا , وبالمناسبة أنا عملت للمدونة صفحة على الفيس للدعاية والتصييت للمدونة دى واللينك بتاعها أهه https://www.facebook.com/aka.azka.blog ,, يلا توكلنا على الله , مين قال جاى ؟