3 - سننتظر
✋ سلام عليكم , إزيكوا يا ولاد .
معلش أنا عارف إنى إتأخرت عليكم فى الكتابة المرة دى , وعارف كمان إنكم مكنتوش مستحملين التأخير ده , بس برضه لازم تعذرونى , لازم تبقوا عارفين إن أمخاخ العباقرة المبدعين ساعات كتير بيجيلها حالة من الجمود , وبيبقى صعب عليهم يتجاوزوا المرحلة دى , أظن إنكوا مش هتقدروا تستوعبوا قصدى بس ما علينا ,,,
" ولأن الحلال أجمل سأنتظر " ,,,, جملة رمة , يحرق أبوها لأبو اللى إخترعها , الجملة دى ومثيلاتها هما اللى مأخرين سن الجواز ومسببين عنوسة للبنات .
طبقا ً لدراسة مش عارف مين اللى عاملها ولا عارف حتى مصداقيتها بس كنت سمعتها فى الأخبار فى التليفزيون وحابب أصدقها , الدراسه بتقول إن فيه 11 مليون شاب وشابة فى مصر معديين سن الجواز , ال 11 مليون دول فيهم 9 مليون بت , محدش جاب سيرة مطلقات ولا أرامل , مصر اللى سكانها فى حدود ال 100 مليون , قول 40 % منهم دكورة , يعنى فيه 9 مليون بت من أصل 60 مليون حرمة , فاتها قطر الجواز , حد فيمينيست ييجى يستظرف ويقول : سن الجواز ده مستلح متاتى , مش ينفع , البنت دلوقتى لازم تحقق كيانها الأول وبعدين تفكر تتجوز ومش لازم تتجوز أسلا ً ,,,, أقول له : بس يا بابا , روح إتفمنست فى حتة تانية , غور , ما تجيش هنا تانى , مخى مش فاضى لمخك ,,,, ال 9 مليون بت دول بقى ذنبهم فى رقبة مين يا متعلمين يا بتوع المدارس ؟ ,, وجهة نظرى ذنبهم فى رقبة الرجالة , الرجالة دول اللى هما أبهات البنات دول اللى حريمهم مسيطرة عليهم أو حتى الرجالة المسيطرة بس نظرة الناس البهايم شاغلة جزء من تفكيرهم , أو إحنا كشباب حيحان جبان , عاجباه جملة " سأنتظر " دى أو متقبلها أو حتى ساكت عليها ومش عايز يغيرها .
لو الواد من دول _ عنده حد الكفاف بس محترم ويعرف ربنا _شاف بت عجبته عندها بتاع 21 سنة مثلا وراح يتقدم لأبوها , أبوها قال له : عندك إيه يا إبنى ؟ الواد قال له : عندى حد الكفاف يا عمى , شقة صغيرة إيجار مثلا , أساسياتها مفروشة فرش متوسط مقبول ومرتب يعيشنا مستورين ودبلة ,,, الراجل قال له : إنتا جاى تهرج ؟ بنتى ما ينفعش تعيش أقل من ما هيا عايشة دلوقتى _ اللى هوا وصل له بعد 30 سنة جواز _ , وقامت الولية أمها مجودة وقايله : ده بنت خالتها جالها شبكة بكذا وساكنة فى شقة تمليك بكذا وكذا وجوزها مرتبه كذا وكذا وكذا .. راح الواد آخد علبة الجاتوه بتاعته وسلام عليكوا ... البت لسه صغيرة بقى عندها 23 سنة وإتكرر نفس الحوار من واد تانى وبرضه خد جاتوهه ومشى ,,, بقت 26 وإتكرر وواد تانى إترفض ,,,, بقت 29 سنة والموقف إتكرر , والله أهل البت هيفكروا جديا ً وساعتها أبوها هيبقى قدام ريسك يا ياخده يا ما ياخدوش , لو خده _ وهيبقى خده _ والبت كسرت التلاتين والله ما هيعدى عليه يوم من غير ما يلعن نفسه ويلعن مراته ويلعن أختها وبنتها وعريسها , ويلعن أهله وأصحابه ومعارفه البقر اللى عمل حساب نظرتهم ليه لو جوز البت لواد راجل محترم إبن ناس بس مستور مش غنى , والله ما هيعرف ينام يوم من غير ما يفكر فى البت اللى وقف حالها وزمانها بتدعى عليه وعلى أمها وعلى خالتها وبنتها ,, ومع كل يوم يعدى هيبقى أقصى طموحه أى كلب يتقدم , غني فقير مش فارقة , محترم ولا إبن كلب مش فارقة ,, بعد ما كان بيتنطط على المحترمين المستورين , هيرضى بعيل مش لاقى ياكل حتى لو كان إبن كلب هيبهدل البت وإنشاله تتطلق منه بعد سنة .
لو بعد 10 سنين الموقف إتكرر تانى مع بت تانية أبوها هيوافق وهيا 25 , لو إتكرر تالت مع بت تالتة مش بعيد أبوها يوافق من أول ولا تانى مرة ,, وبعد كده هيبقى ده بقى العادى وهيبقى ده حال كل بنات الخالات .
إحنا مصدر قوة يا جدعان والله , إحنا 2 مليون هما 9 , ما تخليش لا أهلك ولا أهلها يجبروك تستلف عشان تتجوز , لو عندك 30 سنة ومش متجوز ولا الهوا بمزاجك , هيا لو عندها 30 لأ .
أه الكلام سهل , والتطبيق بالنسبة للجيل الأول من المحررين هيبقى صعب , بس أضعف الإيمان ما تصرفش على التفاهات الجامدة , بتاع إيه البت تروح لكوافيرة معاها بكالوريوس نقاشة قسم بودرة , تبوظ لها خلقتها وتخليها شبه الزومبى وتاخد 5 ألاف جنيه لو كوافيرة مش مشهورة , ولو مشهورة ولا بتتطلع فى التلفزيون الله أعلم تاخد كام بقى , وفى الآخر البت تدخل تستحمى وال 5 ألاف بتوعك يختلطوا بمية الصرف الصحى فى المجارى , بالذمة لو حطيت ال 5 آلاف دول جمبك فى الكومودينو مش يبقى موقفك أقوى ,,,, ولا الفرح , أروح أدفع فى قاعة 7 ألاف , وعيل متنى ملوش شغلانة مسمى نفسه دى جى ب 7 ألاف وفرقة هايفة ب 7 ألاف برضه , عشان شوية حريم يقعدوا يتريقوا عليك وعليها , وشوية بنات لابسة اللى على الحبل فى يوم غرقان شتا , عاملين عرض أزياء ,, وشوية شباب منهم اللى فرحان بالعرض ومنهم اللى بيسب لك عشان عامل فرحك يوم ماتش برشلونة وتشيلسى ,, لأ ونوعين الشباب دول مصممين فرحك ما يخلصش إلا وإنتا نفسك مكسورة وهيبتك ضايعة قدام نفسك , أو حتى على الملأ لو الواد بتاع الفيديو طلع غشيم أو سهى عليه ونسى يمنتج واحدة هوبا من الهوبات الكتير اللى خدتها وظهرت فى شريط الفيديو بتاع الفرح اللى هيفضل دليل قاطع دامغ لا يقبل الشك أو الإنكار , هيفضل يطاردك فى كوابيسك و يفضل موثق الهوبات دى ,,, لأ والعيال بتهوب بغل , ما كل واحد عليه دين و جاى يسده , بتاع إيه أدفع فى الفرح بتاع 30 ألف جنيه عشان العيال تهوبنى , وأنا لما هيبتى تتكسر ومعنوياتى تنخفض وتأثر على آدائى , حد فيهم هينفعنى ؟ , طب ما أحط ال 30 ألف دول جنبى فى درج الكومودينو وأهم يبقوا دعم للواحد يرفعوا معنوياته أحسن .
إصمدوا يا ولاد , ما تستلفوش إلا للضروريات , كفاية هوبا أبوس إيديكم .
إتمسوا بالخير .
لينك صفحة الفيس : https://www.facebook.com/aka.azka.blog
تعليقات
إرسال تعليق