4 - حرية التنمر
✋ سلام عليكم , إزيكوا يا ولاد .
أنا مسامحكم , بقالى حوالى سنة ما كتبتش على المدونة و ولا حد سأل ولا حد عبر , لأ وكمان الصفحة اللى عاملها على الفيس للمدونة نقصت واحد , كانت 28 بقت 27 , أنا بقول للواحد ده هعرفك وهجيبك وأنا اللى هأعمل لك بلوك , أصل مش رجولة يعنى يا كابتن إنك تبقى فى صفحة فيها 28 وتخرج وتسيبهم 27 , ما تخليك ,, ثم ليه أصلا تخرج , الناس بتخرج من الصفحات لما تلاقى كل شوية بوست وخوتة ووجع دماغ فبيسيبوا الصفحة ويمشوا , إنما دى صفحة مر عليها سنة كاملة _ إلا كام يوم _ وكل اللى عليها 5 بوستات باين , يعنى أصلا ما ظهرتش عندك فى الوول , يعنى إنتا دخلت دورت عليها عشان تطلع منها يعنى مع سبق الإصرار والترصد ,, على العموم ما علينا , نخش فى الموضوع على طول عشان ما نضيعش وقت ال 27 عضو الأوفياء المحترمين اللى فى الصفحة ....
------------------------
حرية التنمر _ التنمر ممكن يتعرف مثلا بإنه الإستخدام المتكرر للسخرية ضد شخص بعينه مما قد يؤدى غالبا لإيذائه نفسيا _ ,,, إيه الأسباب المنطقية اللى بتخلى فيه حملات من الجماعات الليبرالية والعلمانية والفيمنستية والمشاهير وامثالهم مثلا ضد التنمر بإستبعاد الأسباب الدينية _ لو مش هنحتكم للدين طالما فيه ناس مش عاوزة تحتكم وعاوزه هيا اللى تحكم _ فى موضوع إن السخرية من الناس حرام , ليه الناس دى بتقف وتعمل حملات ضد التنمر , ليه يحجروا على طفل لطيف سخيف فى الإبتدائية مثلا إنه يزنق واد زميله تخين ولا رفيع ولا قصير ولا طويل ولا أبيض ولا أسمر , ويقعد يهرى بدنه ويقعد فى الراحة والجاية يقول له يلا يا عجل ولا يا نخلة ولا يا بياضة ولا حتى ياض يا أزعة ,, بأى حق أو منطق نعترض طريق الواد الظريف ده فى إنه يقول إفيهاته الكوميدية , ده بدل ما نصقل موهبته فى السخرية , مش يمكن لما يكبر يعمل برنامج كوميدى ولا فيلم يكسبه ملايين , ليه بدل ما نهتم بموهبته وننميها ليه مصممين يكبتوها وكإن " كلمة " الواد المتنمر الناشئ ده هيا اللى هتهد الكون , وبعدين المفروض بدل ما نحاول نكبت الواد ده , نعلم الواد التانى إزاى يواجه الفكر بالفكر , مش نمنع الواد المتنمر من إفيهاته ونعمل عليه حملات وإعلانات وإرهاب فكرى .
----------------------
كلام منطقى تماما ً , إلا إنه أغفل وجود طرف تانى فى الموضوع , وأغفل وجود رد فعل عند الطرف التانى هوا الأهم فى الموضوع .
----------------------
الطرف التاني من الموضوع اللى هوا العيال اللى بيتعرضوا للتنمر ما أظنش هيخرج عن الأنواع دى : أولا ممكن يبقى النوع الضعيف , العيال بتشتمه وتهزقه وغير
قادر على إتخاذ رد فعل فبيدأ يتكون جواه فكرة إنه ضعيف وملوش لازمة
فبيتعايش مع الإساءات ووممكن يبدأ كمان يستسيغها والموضوع يقلب معاه
بتشوهات نفسية كبيرة ... ثانيا النوع الكتوم , والنوع ده شخصيته إلى حد ما ضعيفه مش هيقدر يرد على المتنمر ومش هيقدر يتعايش نفسيا مع السخرية المتكررة , والموضوع هيقلب معاه غالبا لكبت نفسي وده فى المستقبل مش متوقع رد فعله ضد الكبت النفسى اللى إتعرض له , وممكن فى المستقبل الكبت ده يطلب منه حاجات ما تتخيلش إنها تطلع من حد زيه _ شخص من بره هادى بس جواه بركان نفسى محدش عارف إمتى وفين وإزاى ومدى إنفجاره _ .... ثالثا ممكن يبقى من النوع قليل ضبط النفس تيجى تتريق عليه يروح ماسكك متشاكل معاك _ من الشَكَلْ أى الخناق أو العراك _ ويا ضربك يا ضربته , وكل ما تتريق هيتشاكل معاك , مرة يعورك ومرة تعوره , ولو ربنا إداله شوية صحة وإتمكن منك ممكن يتطور ويبقى هوا المتنمر وإنتا تبقى اللى بيتنمر عليك , ومع الصحة الموضوع هيقلب معاه ببلطجة ..... النوع الأخير بقى ممكن يكون النوع القوى الشخصية , وده مخه كبير وعارف كويس إن الواد
المتنمر ده أقل من إنه يهتم بكلامه , برنس كده فى نفسه , الواد يقول له "
عمود نور هربان من الشبكة " وهوا سامي بمخه ولا يرد على مخهم , الله يمسينى
بالخير والله .
----------------------
مع عدم إغفال الطرف التانى يبقى المنطقى فعلا إن التنمر يتواجه ويتعمل ضده حملات توعية و " تلزم " المدارس مثلا بتعديل سلوك الأطفال المتنمرين وعقابهم إن لزم .
----------------------
طب ليه بقى يا عسل إنتا وهو , إنتوا ضد حرية التنمر ومش واخدين نفس الموقف مع التبرج ؟!!! ليه عايزين يبقى من حق الحرمة تلبس على كيفها ومش عايزين الواد يتنمر براحته ؟!!! إيه الفرق بين الموقفين , الموقفين واحد , نظريا حرية شخصية بحتة , من حق الحرمة تلبس اللى هيا عايزاه , هيا ما أذتكش فى حاجة , ومن حق الواد يتريق براحته هوا ما لمسكش , ولو مش عاجب الأولانى يغض بصره ولو مش عاجب التانى يسد ودانه ,, ليه فى التنمر بتبصوا للطرف التانى من الموضوع وفى التبرج مش عايزين تشوفوا الطرف ده ,,, الحرمة المتبرجة اللى ماشية على سنجة 10 دى أذت نفسيا كام واحد وكام واحدة , ماشية تتمنظر بحاجات عندها فى حين غيرها من الحريم معندهمش أو عندهم بس مش حلو ,,, آذت نفسيا كام واحد عمال يشوف فى الشارع ما لذ وطاب ويروح البيت يا ميلاقيش عنده أو يلاقى بس متوسطة أو حتى تحت المتوسطة ,,,,,, نفس ردود فعل التنمر ممكن تلاقيها ضد التبرج ,, ممكن تلاقى اللى يشوف زى ما يشوف ولا يتهز له شعراية ومش بمزاجه ربنا يعافينا ., وممكن تلاقى اللى الموضوع يقلب معاه بكبت لما يشوف حاجات حلوة ويروح البيت يلاقى حاجات وحشه أو حتى ميلاقيش , ده هيخرج كبته إمتى وفين وإزاى محناش عارفين ,, ممكن تلاقى اللى عايز يتأكد بنفسه من جودة المعروض فيمد إيده يشوف , ولو الظروف خدمته ممكن يمد حاجات تانية وندخل فى قصص تحرش وإغتصاب وهم ما يتلم ,, وممكن برضه تلاقى اللى عنده رضا نفسى وراضى باللى عنده أو صابر ومستنى يبقى عنده وماشى محترم نفسه وغاضض بصره ,,,,, ثم طالما مخرجين الدين من الموضوع إيه الحد اللى المفروض تقف عنده حريات الناس فى موضوع زى اللبس مثلا ,, يعنى إيه القدر من التبرج اللى قبله نقول على اللى لابساه حرة وبعده نقول عليها عاهرة ؟!!!!!
-----------------------
-----------------------
ثم ما الرجالة برضه من حقها تلبس براحتها بقى , يعنى مثلا واحد زيى من حقى أمشى ملط فى الشارع , واحد زيى مثلا يعمل إيه عشان يلفت نظر الحريم فى الشارع , الوسامة نسبية عارفين بس برضه بيقولوا الحلو بيروح للحلو , طب أنا طويل ورفيع وعلى وشك أكون _ لو لسه ما كنتش _ أقرع , إيه ممكن يخلينى أعجب حرمة حلوة , ما أنا برضه هرموناتى ميكفيهاش واحدة عادية , أنا هرموناتى شديدة وميكفيهاش صاروخ دى عايزة قاعدة صواريخ , وهيا جوازة واحدة لو عرفنا نتجوزها أصلا ,, هتحبنى علشان شخصيتى مثلا ؟!! أنا ما بكلمش حريم وإن كلمت غشيم , فعلى ما تفهم إنى شخصية فشيخة لا تعوض هتكون إتقفلت منى أصلا ,, هتحبنى على مخى وكونى أذكى حد عايش مثلا ؟!! ما يمكن المواصفات الخارجية اللى أنا عايزها ملاقيهاش إلا على واحدة حمارة بهيمة ما تعرفش حاجة عن المخ غير إنه بيتحط فى ساندوتشات عند شيخ السمين بتاع إسماعيلية الله يمسيه بالخير ,, يعنى أنا خارجيا مش شغال يبقى أقلع بقى وأظهر مواهبى وإمكاناتى الداخلية , ولا إحنا مش من حقنا نقلع زيهم ؟!!! لازم كلنا نبقى ضد التمييز ضد الرجال ,لازم تبقى حرية التبرج والتنمر وكل الحريات مكفولة للجميع بلا حدود وبدون عنصرية أو تمييز .
-----------------------------
إتمسوا بالخير .
لينك صفحة الفيس : https://www.facebook.com/aka.azka.blog
تعليقات
إرسال تعليق