أذكى حد عايش

✋ سلام عليكم , إزيكوا يا ولاد ,  النهارده هنتناول أفكار أول 4 حلقات فى برنامج خواطر وهم ومش شرط بالترتيب , السعادة , التدخين , العظماء , الإعتماد على الخادمات والمربيات .  _ بالنسبة للسعادة : فأنا الصراحة هأمتنع عن التعليق عن الموضوع ده إستشعارا للحرج وهأكتفى بتوضيح إنى وبالترتيب : أولا ً عايش فى مصر , ثانيا ً مصرى , ثالثا ً ممعاييش ال 300 ألف جنيه  . _ بالنسبة للتدخين : فأنا بصراحة آرائى فى الموضوع ده عنيفة شوية أخاف لا الفولوور الوحيد اللى حيلتى فى المدونة الأخ أوين بيتر الشهير بمحمود جمال يزعل , أنا عارف إن جمى مكانش بيشرب وإحنا فى الكلية بس مش يمكن يكون بقى بيشرب دلوقتى وكلامى يزعله ونخسر 100 % من الفولوورز بتوع المدونة ,,,,,, وأه يا عم , أنا ببيع آرائى ومبادئى عشان الفلوس المحتملة , ملكش دعوة , وأقول لك على حاجة , لسه كمان فيه مبدأين عندى جوه عاينهم أبيعهم فى وقت عوزة , ما يخصكش  . _ بالنسبة للعظماء : فأنا برضه الصراحة إستشعرت الحرج ومش هتكلم عن الموضوع ده , وكده كده البرنامج الوثائقى اللى ناشيونال جيوجرافيك هتعمله عنى بعد 10 سنين تقريبا هيشرح الموضوع ...

✋ سلام عليكم , إزيكوا يا ولاد , أنا عملت المدونة دى مش عشان أفيدكم بأفكاري المهمة جدا , ولا عشان أعبر عن نفسى ككاتب لعل وعسى أنفع وأعمل كتب كتير بقى وأتشهر وأطلع أقول لكم : بلاش تسرقوا مجهودى يا جماعة وبلاش المحروق ال pdf ده وفين حقوق النشر ,,,, لأ , بصراحة أنا عملت البتاعة دى عشان عايز يبقى معايا فلوس بالهبل وألحق أحوش ال 300 , 350 ألف فى خلال سنة ونص بالكتير عشان أبدأ تنفيذ المشروع اللى هيحتاج مني حوالى 3 سنين من الفحت والردم , بس هيجيب حقه المفروض يعنى - طبقا لدراسة الجدوى الرهيبة اللى عملتها - بعد سنة واحدة ,( وده يبقى المشروع الممول للمشروع الرئيسى ) وبلاش يا جماعة حد يسألنى على المشاريع , لا المشروع الممول ولا المشروع الرئيسى  , لأ ما تبوسش كتفى , ولا دراعى , ولا ودنى ( يا شيخ إتنيل , قال يعنى حد هيقرا الهرى بتاعك ده , لأ وكمان هيسأل ) , المهم , أنا عايز 300 ألف ومفيش قدامى حتة أمسك منها فلوس كتير فشخ غير هنا , وطبعا أنا جديد هنا , لا عارف أروح فين ولا آجى منين , فهأقعد أرازى فيكوا يمين وشمال لغاية ما حد ربنا يستره يرحمنى ويرحمكم ويدينى ال 300 ألف دول كهبة لا ترد , وتبقى ...